.Reaksyon.

Minsan, nasabihan akong nag-aastang magaling magbasketbol, pero lampa naman. Hindi naman talaga ako magaling magbasketbol (sa banyo siguro magaling ako magbasketbol; listen sa isang Eheads song). Kaya nag-aral akong magbasketbol. Kaya ngayon, magaling akong mang-agaw ng bola at mag-free throw. Ang mga kahinaan ko sa basketbol ay dribbling, assists, lay-up, three-points, at baldaduhan. Pero at least, marunong akong magbasketbol (yehey to macho fantasy! yehey!)

* * *

Minsan, nasabihan akong nagmamarunong kumanta. Inilagay ako sa Tenor 1 ng aming high school choir noong second year ako. Dalawa kaming pinakamataas ang nota sa dulo ng awiting Lupang Hinirang. Yung huling mga salitang "sa 'yo" o dalawang nota ang siyang hine-head tone namin ng kapwa Tenor 1 ko noon kapag kumakanta sa Friday Flag Ceremony. Pero habang tumatagal, lagi na akong pumipiyok sa pag-awit. Nung nag-audition ako sa Yamaha Con-con, pumiyok ako sa linyang "Make the world understaaaaand..." ng kantang Paraiso ng Smokey Mountain. Hindi ako nakapasok sa finals. Nadiskubre ko na hindi ako magaling na mang-aawit kapag klasikal ang paraan ng pag-awit. Kaya nagpaka-pop ako, at minsan nag-aaral ako sa sarili lamang ng Jazz at RNB at ballad. Kaya kadalasan ay napapaghalu-halo ko ang mga ito para maging isang centrifugal song. Wahehehe. Paborito kong gayahing umawit ang/sina Brent Anderson ng Suede, Gavin Rosdale, Jose Mari Chan, Eraserheads, Oasis, Paula Cole, No Doubt, Jewel, Toni Braxton, Annie Lennox, Steps, 911, Backstreet Boys, at marami pang ibang boy bands at girl bands. Ang paborito ko ngayon ay yung bandang kumanta ng "Push." Kaya ngayon ay kumakanta ako ng sarili kong bersyon (minsan belting) ng mga kanta ni Gary Valenciano.

* * *

Minsan, nasabihan akong nag-aastang manunulat. Oo naman. Minsan. May. Kakalabit. Sa. Iyo. May. Hawak. Na. Baril. At. Ang. Susunod. Niyang. Kakalabitin. Ay. Ang. Gatilyo.